چین وسطی ایشیا سربراہ اجلاس۔ | تحریر : شاہد افراز خان ،بیجنگ
چین کے صدر شی جن پھنگ قازقستان کے صدر قاسم جیمروت توکیوف کی دعوت پر 16 سے 18 جون تک آستانہ میں ہونے والے دوسرے چین وسطی ایشیا سربراہ اجلاس میں شرکت کر رہے ہیں۔ماہرین کے خیال میں یہ سمٹ چین اور پانچ وسطی ایشیائی ممالک قازقستان، کرغزستان، تاجکستان، ترکمانستان اور ازبکستان کو اسٹریٹجک اعتماد کو گہرا کرنے، عملی تعاون بڑھانے اور غیر یقینی صورتحال سے بھری دنیا میں مشترکہ طور پر استحکام اور مثبت رفتار میں حصہ ڈالنے کا ایک نیا موقع فراہم کرے گی۔اس سے چین۔وسطی ایشیا کے میکانزم کو مزید تقویت ملے گی، چین۔وسطی ایشیا تعاون میں مزید نئے نتائج سامنے آئیں گے اور مشترکہ مستقبل کی حامل چین۔وسطی ایشیا کمیونٹی کی تعمیر میں ایک نیا باب کھولا جائے گا۔
25 جنوری 2022 کو چین اور پانچ وسطی ایشیائی ممالک نے مشترکہ طور پر ایک ہم نصیب چین وسطی ایشیا کمیونٹی کی تعمیر کا اعلان کیا تھا۔ سنہ 2023 میں پہلی چین وسطی ایشیا سربراہ کانفرنس کے دوران شی جن پھنگ نے ایک قریبی کمیونٹی کی تعمیر کے لیے ایک واضح روڈ میپ کا خاکہ پیش کیا تھا، جس میں چار اہم اصول شامل تھے: باہمی تعاون، مشترکہ ترقی، عالمگیر سلامتی اور لازوال دوستی۔اس کے بعد ، پہلی سمٹ سے پیدا ہونے والی رفتار ٹھوس پیش رفت میں تبدیل ہوئی ہے۔ تمام چھ ممالک اب ان کامیابیوں کو مستحکم کرنے اور گہرے علاقائی تعاون کے لئے نئے راستے تلاش کرنے کے منتظر ہیں۔
کہا جا سکتا ہے کہ مئی 2023 میں منعقدہ چین۔وسطی ایشیاء سمٹ ایک تاریخی واقعہ تھا، جس نے امن، ترقی اور باہمی احترام کو ترجیح دینے والے کثیرالجہتی طریقہ کار کو باقاعدہ شکل دی۔ سمٹ کے سب سے اہم نتائج میں سے ایک شی آن اعلامیہ تھا، جہاں چھ ممالک نے ایک خوبصورت مستقبل کی حامل قریبی چین۔وسطی ایشیائی کمیونٹی کی تشکیل کا عہد کیا۔تب سے، مختلف شعبوں میں ٹھوس تعاون کے منصوبے شروع کیے گئے ہیں، جو شی آن سمٹ کے نتائج کو حقیقت میں تبدیل کر رہے ہیں۔ مثال کے طور پر، چین۔کرغزستان۔ازبکستان ریلوے منصوبہ، جو طویل عرصے سے زیر بحث تھا، باضابطہ طور پر تعمیر کی تیاری کے مرحلے میں داخل ہو گیا ہے۔ تکمیل کے بعد یہ لاجسٹک اخراجات اور وقت کو نمایاں طور پر کم کرے گا، اور پورے علاقے میں تجارت کی کارکردگی کو بڑھائے گا۔ اس ریلوے منصوبے سے توقع کی جاتی ہے کہ یہ ایشیا۔پیسفیک خطے کو یورپ سے جوڑے گا، جو ٹرانس یوریشیائی نقل و حمل کے لیے ایک نیا حل فراہم کرے گا۔
ریلوے، بیلٹ اینڈ روڈ انیشی ایٹو کے تحت چین۔وسطی ایشیا کی عملی تعاون کی ایک واضح مثال کے طور پر کام کر رہی ہے، جو مسلسل اعلیٰ معیار اور حقیقی نتائج دے رہی ہے۔اس ضمن میں ،کنیکٹیویٹی اور صلاحیت کے تعاون سے لے کر صاف توانائی اور بنیادی ڈھانچے تک تعاون مسلسل فروغ پا رہا ہے۔قازقستان میں، چین۔قازقستان خام تیل اور قدرتی گیس کی پائپ لائنیں اور شیمکنٹ کی تیل ریفائنری مستقل طور پر کام کر رہی ہیں۔ ازبکستان میں، سیردرییا علاقے میں 1,500 میگا واٹ گیس سے چلنے والے پاور پلانٹ کے منصوبے کا آغاز ہو چکا ہے، اور اولمپک سٹی کا منصوبہ ہموار ترقی کر رہا ہے۔
تاجکستان میں، تعاون کے منصوبے بشمول سرکاری عمارتیں، پارلیمنٹ کے دفاتر اور چین۔تاجکستان ہائی وے کے دوسرے مرحلے کے اہم حصے فعال طور پر نافذالعمل ہیں۔ چین کی قومی پیٹرولیم کارپوریشن کے مطابق، مارچ 2025 تک، ترکمانستان اور چین کے درمیان قدرتی گیس کی تجارت کا حجم جو چین۔وسطی ایشیا گیس پائپ لائن کے ذریعے ہو رہی ہے، 430 بلین مکعب میٹر تک پہنچ گیا ہے ، جو چین کی سالانہ گیس کی پوری کھپت کے برابر ہے۔
چینی وزارت تجارت کے مطابق، 2024 میں چین اور پانچ وسطی ایشیائی ممالک کے درمیان تجارت 94.8 بلین ڈالر سے تجاوز کر گئی، جو 2023 کے مقابلے میں 5.4 بلین ڈالر کا اضافہ ہے۔ وسطی ایشیا میں چین کی سرمایہ کاری خاص طور پر سبز توانائی اور زرعی پروسیسنگ کے شعبوں میں بڑھ رہی ہے۔ وسطی ایشیا بیلٹ اینڈ روڈ انیشی ایٹو کا ” مقام آغاز” اور ایک اہم ماڈل علاقہ ہے، اس سمٹ سے یہ توقع کی جا رہی ہے کہ اعلیٰ معیار کے علاقائی تعاون کو مزید آگے بڑھانے کے لیے تجارت اور سرمایہ کاری میں تیزی کے ساتھ ترقی ہوگی۔ یہ سمٹ نہ صرف کثیرالجہتی تعاون کی کامیابیوں کو دکھانے کے لیے ایک موقع ہوگی بلکہ جنوب۔جنوب تعاون کے لیے ایک نیا ماڈل بھی فراہم کرے گی ۔
